Қазақстандықтар Сингапурдегі әлем чемпионатындағы өнерін аяқтады

Қазақстандық жүзушілер ұлттық рекордтарға жақын нәтижелер көрсетті.

Қазақстандық спортшылар Сингапурда өтіп жатқан су спорты түрлерінен әлем чемпионатының жетінші күні өз өнерін аяқтады, деп хабарлайды Insports.kz. Құраманың соңғы жарыс күнінде, 3 тамызда, суға Аделаида Пчелинцева шықты. Ол 100 метр брасс қашықтығында іріктеу кезеңінде лайықты нәтиже көрсеткенімен, жартылай финалға өте алмады. Оның уақыты мен қорытынды орны команданың бас бапкері ұсынатын жалпы есепке енгізіледі. Оған дейін Ксения Игнатова 200 метр арқамен жүзуде 2 минут 14,09 секунд нәтижемен 28-орын алды. Әділбек Мусин екі қашықтықта өнер көрсетті: 100 метр баттерфляйда – 22-орын (51,87 секунд), ал 50 метр еркін стильде – 52-орын (22,84 секунд). Софья Сподаренко 50 метр баттерфляйда 26,75 секунд нәтижемен 32-орынға тұрақтады. Барлық қазақстандық спортшылар ұлттық рекордтарға жақын нәтижелерге қол жеткізді. Алайда жоғары жаттығу жүктемесі мен Малайзиядағы соңғы оқу-жаттығу жиындары спортшыларға шарықтау деңгейін көрсетуге мүмкіндік бермеді. Команда штабы спортшылардың басты назарын күзгі жарыстарға бағыттап отырғанын айтады.

«Біз жүктеме аясында өнер көрсетіп жатырмыз, күзге дайындалып келеміз. Маңыздысы – біз тоқтап тұрған жоқпыз, бірақ бүкіл әлем де дамып келеді», — деп атап өтті команда өкілдері.

Енді құраманың басты мақсаты – 27 қыркүйек пен 3 қазан аралығында Үндістанда өтетін Азия чемпионаты және қарашада Сауд Арабиясында өтетін Ислам ойындары. Дәл осы жарыстарда қазақстандық жүзушілер ұлттық рекордтарды жаңартуға және бар күшін көрсетуге үміт артып отыр.

27 шілдеде басталған әлем чемпионатына 200-ден астам елден 1000-нан аса спортшы қатысты.